A B C D E F G H I J K L M N O P Q R S T U W X Y Z
Zulkuf Kişanak - Xezale
125 Xwendin
0 Ecibandin
Asoya Helbesta Kurdî

Zulkuf Kişanak - Xezale

Vewre
Hende varayne ke çimî çim nêdiyêne
şêx Mîrzo de, Silekose de
Dewa koyanê berzan de
Kerreyo çîlsiyayî ra pey

Erê
Erê to rê
Pîlê koyan, Agirî
To çi dî û çi nêdî, bê erş û asmênî

Xezalê
Vilika Koyê Nuhî, adirê zerriya Ozê Heskê
Eşqa şarê Serhedî, eşîra şemkan, Celaliyan
û birîna bêwexte
Veng bide, sey fîte-fîta vayê Koyê Tendurekî
De veng bide

Pêro
Pêro camêrdî, qelenderî
û şerwanî
Hetê Zangorî ra xo veraday cêr, vera Newala Zoravayî
Hawar, hawar a roja tenge û tarî rê
çar kîştan ra guley varay sey zîpike
Tirkan, orisan, eceman û farisan dorûver tepiştibi
Bêkes mendibi şarê koyî
û remî rê zî ray nêmendibi, delalê
Sey ewroy

Cinî
Camêrd
Qeçî û kokimî
Dima ra estoran xo verada no kaş ra
Kaşê mergî
Dereyê Zemyanî ra
Serre, hezar û new sey û hîris bi
Wext zî
Wextê îhsan Nûrî û Ozê Heskê bi
Bira

“erê
Mi ra vanê Mistefa
Mistefayê Silekoseyî, dewa corî ra ya ez
La ke tirkan Bobîlîk zî nayo pa, ê vanê “Mustafa
Bobilik”
A serre ez hurdîlek biya, des-diwêsserre
Xezale zî hewtês-heştêsserra biye
Sifte Serdarbûlak tepiştbi tank û topan
Cor a, bi gurre-gurr teyarey ameyî, teyarey
Ne vatêne qeç, ne vatêne cinî, ne vatêne kokim
û da piro nê zaliman
Bê remî ma rê rayîrêna nêmend
û no kaşo bêwayîr, Derê Zemyanî
E,
E willey û bîley kurê min
Sey nikayî
Ma ra tay merdî, tay zî xelisiyay destê nê tirkan ra
û resay Mako, merdimanê xo yê kîşta bîne het
No fin farisan mecal nêda ma, ewilî berdî Kelaxoy
Dima ra Tambat, Xoy
û badê cû zî berdî kîşta Qezwînî
çend serrî raviyartîbî ke ecemî, farisî zixt û zorê xo ra kewtî
O wext zî ma verê xo da Mihabad,
Welhasil uca ra zî ma xo eşt bextê Seyid Tahirê Nehrî
Kurdistanê Başûrî de
çend serrî ra tepiya zî agêray Gever, eşîra Zeydanî het
Uca de zî ma hîrê serrê xo bi xulamiye raviyarnay
Erê kekê mi
û badê cû ma şiy Dereyê Kûturî, kîşta Rojhilatî
Dima ra serre bî hezar û new sey û pancas û di
Peyniya peyine de ma agêray Silekose
Dewa hewnî, hewnê mi
Sewbîn ez se vaja to rê, kurê mi
Nameyê mi Mistefa yo, xo vîrî ra mekerêne ha
Wa no bibo qewlê ma
Sozê ma”

û Xezale,
Vilika koyan
Kêna Ozê Heskî, derba zerriya camêrdan
Uca
Binê koyî de, kaleka xo day kerrey û bêveng kewte
Dima ra perra
û perra

Xezalê
Xezala Koyê Nuhî
Pîlê koyanê berzan
Biye Binevşe, Bêrîtane, Bermale û Zîlane
Seraserê welatê rojî de, Kurdistan de
Perra û perra
Delalê

û delala çimrengîne, eşqa girde
Tîja mi
Şîrove

Ka tu şîroveyeke giranbuha li vê helbestê nakî?