A B C D E F G H I J K L M N O P Q R S T U W X Y Z
Walî Bedelpûr - Di Gel Bayê Seher
153 Xwendin
0 Ecibandin
Asoya Helbesta Kurdî

Walî Bedelpûr - Di Gel Bayê Seher

Di gel bayê seher bo min, himêzek gul delalê şand
Ji nû dîsan rihê eşqê, li nav cerg û dilê min çand

Ji ber bayê evînê can, ciwan û cam ji mey can bû
Heyamê nûbihara min hedîsa aşinayî xwand

Silavek şand ji bejnê û kilamek da bi ser lêvan
Şeraba kamiranî bû ku ser can û beden barand

Bi nazik îşweyên çavan sema da bejn û balayê
Bi awir gote min dilber, ku burca firqetê sotand

Işaret kir li bejna xwe bi xemlek bêmisal û nab
Li min pêşkêş kir û rabû sirûda wesletê rêsand

Xeyalatên li nav fikr û hemû hizrên dilê min da
Bi yêkcarî bi cih hatin dema dilber evîn xulqand

Nema Walî tek û tenha li ber pêlên nehezxazan
Ku bonyada ewan vêkra delala dilhebîn rûxand

د گەل بایێ سەحەر بۆ من، همێزەک گول دەلالێ شاند
ژ نوو دیسان روحێ عەشقێ، ل ناو جەرگ و دلێ من چاند

ژ بەر بایێ ئەوینێ جان جوان و جام ژ مەی جان بوو
هەیامێ نووبهارا من حەدیسا ئاشنایی خواند

سلاوەک شاند ژ بەژنێ و کلامەک دا ب سەر لێوان
شەرابا کامرانی بوو کو سەر جان و بەدەن باراند

ب نازک عیشوەیێن چاوان سەما دا بەژن و بالایێ
ب ئاور گۆته من دلبەر، کو بورجا فرقەتێ سۆتاند

ئشارەت کر ل بەژنا خوە، ب خەملەک بێ مسال و ناب
ل من پێشکێش کر و رابوو سۆروودا وەسلەتێ رێساند

خەیالاتێن ل ناو فکر و هەموو هزرێن ژ دل دا بوون
ب یێک جاری ب جح هاتن دەما دلبەر ئەڤین خولقاند

نەما والی ئیرۆ تەنها ژ بەر پێلێن نەحەزخازان
کو بۆنیادا ئەوان وێکرا، دەلالا دل حەبین رووخاند

Wezn: مفاعیلن مفاعیلن مفاعیلن مفاعیلن
21/adar/2018
Ûrmiye