A B C D E F G H I J K L M N O P Q R S T U W X Y Z
Seydayê Tîrêj - Cenga Du Dîkan
186 Xwendin
0 Ecibandin
Asoya Helbesta Kurdî

Seydayê Tîrêj - Cenga Du Dîkan

Dîkê gewr û bê nîşan
Pir mêrxas û qehreman

Ew dîkê şeng û bedew
Li ser pîna xwe bû ew

Pîne milk û malê wî
Cihê bav û kalê wî

Bi mirdiyaq û pûş û ax
Deh rêz kerpîç û yek max

Li cem dîkê dîlawer
Hêja bû textê Qeyser

Dibê hebû li taxê
Dîkekî mala axê

Yekî reşî çel kumik
Bê tor e û wek cirik

Geraze û bi nav û deng
Êrîş bire dîkê şeng

Dîkê gewrî gerden rût
Niklê xwe wî li hev sût

Ku ew dîkê b`hing û deng
çav di serî bû pereng

Bi mêranî wek ejder
Ji jor xwe avête ser

Wek mêran bê tirs û rev
Bi nikilan hatin hev

Dizîvirîn li çar dor
Kumik li hev kirin sor

Ketin ber pêx û hembêz
Perî ji wan bûne rêz

Dîkê gewrî hiner baz
Paşê dibû serfiraz

Zora dîkê axê bir
Laşê wî tev nikil kir

Pê ve ne hişt pûrt û per
Ji ber pîna xwe kir der

Polî poşman vegerî
Lê mixabin bê terî

çavsorî kotek û zor
Jê ra nema dem û dor

Pir dijwar e çerxa dem
Xwe mede ber ey tu hemdem

Binêr çi hat serê dîk
Ne terî ma ne perîk

Ku ew dîkê çel kumik
Bû tayê dîkê şinik

Guh bide xêzên Tîrêj
Di ser guhên xwe`r mavêj
Helbestên din ên Helbestvanî/ê