A B C D E F G H I J K L M N O P Q R S T U W X Y Z
Seydayê Tîrêj - Çar Demên Salê
118 Xwendin
0 Ecibandin
Asoya Helbesta Kurdî

Seydayê Tîrêj - Çar Demên Salê

Keyo rabe binêre, dinya îro bihar e
Guhê xwe tu bidêre, barîna berx û kar e

Qadê kirasekî şîn, wergirtiye bejna xwe
Kulîlk bi sed reng û bîn, li ser qadê siwar e

Mirxe bi kewt û ref tên, ji zozana ber bi xwar
Silav dikin li deştê, bi perwaz û bi par e

Sazbendê wane bilbil, bi dengê xwe dinale
Derman dikî dilê kul, biharê xweş bihar e

Tê de dibuhirînin, hersên mehê biharê
Paşê yekî dişînin, bê ma zozan hê sar e

şandik ji bo texmînê, diçin zozên çi zû tê
Li wan dikî mizgîn, li zozana bihar e

Ji deştê tev bi xatir, diçin war û cihê xwe
Berê xwe didne bakûr, bi lez û bez û xar e

Hinga berateyê gewr, dikevite rû erdê
Hê nû bihar dibe stewr, ceh û genim li dar e

Bihar bi rengê heşîn, xatir ji me dixwaze
Li pey wî tête havîn, bi xûr û bêr û kar e

Havî bi xwe sê meh in, payiz di bergê da ye
Roj bi roj û hin bi hin, ba hênik û geh sar e

Meriv vêga dizanî, havîn bi germa xwe çû
Payiz dike xuyanî, ewr li bala diyar e

Cîhan dibe wek leylan, ji rewrewk û dûmanê
Bi wî bayê xwe peland, diweşîne ji darê

Payiz digel sê mehan, ew jî diçe dibhure
Paşê dibe zivistan, zivistan pir dijwar e

Rojê du-sê-çar carî, teyrok û berf û baran
Ji wan ewrên di tarî, li ser me xweş dibare

şer û cenga zivistan, ew jî bi xwe sê meh in
Di pey wan her sê mehan, dem û benga Adar e

Adar mehek ji her sê, mehên bihara rengîn
Gelî xwenda vê dersê, ji ezber kin bi kar e

Her dem ji bo we Tîrêj, dikî kar û xebatê
Ji bo we bûye dengbêj, bi gazî û hewar e
Şîrove

Ka tu şîroveyeke giranbuha li vê helbestê nakî?

Helbestên din ên Helbestvanî/ê