A B C D E F G H I J K L M N O P Q R S T U W X Y Z
Seydayê Keleş - Şîna Tîrêj
174 Xwendin
0 Ecibandin
Asoya Helbesta Kurdî

Seydayê Keleş - Şîna Tîrêj

Tu nîşana me bû seydayê Tîrêj
Tu sitêra me bû tu bû gelawêj

Belê seyda te em dane kul û xem
Tu dîwana me bû tu bû serecem

Tu bû ê ko te germî pir dida me
Bi me xweşkir te ev kar û keda me

Te barê me girantir kir hevalo
Te xatir jî ji me nexwest çima lo

Te em kuştin bivê derba xedar e
Te dil sotin li me hişk kir buhar e

Tu seydayê me bû rênasê Kurda
çima îroj te zû destê me berda

Tu hêja bû çima te ber nebir ser
Alîkarê gelê kurd bû li her der

Erê seyda ji nav me tu cuda bû
Te benda me şikand û pir xera bû

Tu hevalê Cegerxwîn û Keleş bû
Berî çil rojî ew roja me reş bû

çima em kurd bicarek bê si`ûd in
çima dijmin li ser me tim şerûd in

Va Afxan û Felestîna me hel bû
Para gelê kurdî çima xerdel bû

Divê çêkin civak û kom û cerdan
Welatê me hê meydana zigurdan

Serî rake were bayê me rabû
Ji Êlûlê ve bî tir ew xuya bû

Tu mizgînê bide koma şehîdan
Wekî xanê Cegerxwîn û Qedrî can

Ji wan re bêj Keleş va name rêkir
Ji yezdanê mezin wî bo me çêkir

Dem hatiye wê perde bên çirandin
Qeyd û zincîr wê tevde bên şikandin

Bê xem razin neyar wê tev nemînin
Ji zû ve kurd li ser wan tev bi kîn in

Eger bimrin wê gel tev bêne meydan
Li Kurdsitanê namînin perîşan

Bi zarê xwe emê tevde bixwînin
Nêzîk maye azadiyê bibînin

Ezê bankim ji Gir Keftar tu rabe
Welatê me dibin destan de nabe

Were cejna me pîroz ke bi rastî
Guman heye dever tev bibe haştî

Gelî kurdan kul û derdan veşêrin
Li ber bayê demê kevan bidêrin

Dema me hatiye divê ne razin
şev û rojan heqê xwe hûn bixwazin

Bi xamê tev bikin cenga neyaran
Pirtûk û nameyan çêkin bibaran

Hezar carê se`et xweş be tu Tîrêj
Heta saxim ezê herdem bikim bêj

Te sê pirtûk ji me`r hiştin birawo
Ji vî karê hêja û pirbuhawo

Gelê kurdî li ser gora te kom in
Li ser te şînê dikşînin bidom in

Hezar heyf û mexabin tev dibêjin
Ser û jêr in li ser te mest û gêj in

Hezar rehmet li gora te bibarî
Hezar baqê gulan bo te diyarî

25/4/2002
Helbestên din ên Helbestvanî/ê