Serkeft Botan - Zo(ma)fer

ji pêşengên wêjevan re
raxistinek miştaxa
ezmana
ji neqepşevan mirin dipelandin
ji palçiyayên tevizandî
bêhna
kulîlkên bihîva
şevbihurkên kal
dikeyandin bi hilma şevê
gencîneya tenê peyva
reqsa penûsên delodîn bû
ji pêşmalzimanê awesta
bizarkerên
lahtên winda
ji nîgariyên incika vê erdnîgariyê…
mexelên gonxwarî beridîn
ji esmeriya te
dane riya çûn-nehatê
dil ranazê li qesra raza
dil bû pêlên derya baza
dil bi zikra derwêşan ket
dil bû evdal
dil li refa çiyan vêket
dil ricifî
dil ronaka roja rijî
dil bû ava li girava…
li şîr mane peyamên xav
xêza tariya bêbext de
axîn noqî derya dibûn
ji nepeniyên rênasa
şevên bi lêz
şevên bi bez
gavên gumandî
hilkirin
daw û delingên
hevrîşim
dibûn heval
bi stêrkên hevalan re
ku pir dibû ji bêhna axê
ku zîz dibûn bi destên sibê’r
bablîzokên çavên semîramîs
diherikîn
gulîyên
edûlê…
de ka were
dayika zarokên agîrî
min bêriya ramûsanê te kir
roj li nîvro
li nav dahla
dibin gulxunavkên
rûbara
kanê zerzengê kulîlka
me ji sibata dînik danhev
fetlên
fetlîneken gulîsorkî
ji gerdena stêrkên girava
de ka were
biguvêşe kezepreşan
xewnên mîratmayî
dawerivên lutkê çiya
serpêhatiyên zarokên rojê
xela salê dûr in
turikpişta de dilivin
şikestinên serdemên lal in
diperpitin
li şewla dil
şop in
kildankên çava kil dikin
terş in
digindirin mêrga hêviya
ka kê avda tava heyvê
kê roj dageran gerdena
kê cebiran bazikên şevên şikestî
êşên rojhilat in
lawik
xwe sipartine bejna te
dekên rojavaya silin
dilehîzin
bi zomafera seriyan…

gulan 2002