A B C D E F G H I J K L M N O P Q R S T U W X Y Z
Selahedînê Gimgimî - Yara Min 3
76 Xwendin
0 Ecibandin
Asoya Helbesta Kurdî

Selahedînê Gimgimî - Yara Min 3

Di ezel gava ku yar taze dihatin girtinê
Ji hemî rind û çelengan mi bijartî te tenê

Ta ji wê rojê ji cama te giran serxweş û mest
Agirê Işqa te wek dozêx e ku em ketinê

Tu mecal êdî nedî me mane bê sebr û qerar
Qey ‘ezabê axretê em dikişînin di dinê

Meke nazî çikû gava tu dikî nazdariyan
Ew dimîne ku bide rûhê me terka bedenê

Vê zivistanê zoriya te em birîne ji hal
Çer dibe ma tu demek bînî biharê bi kenê

Roj û şev karê me tim axîn û oxîn û hewar
Ma tu zanî te çi anî vî serê min rebenê!

Ramûsanek ji delalê bi du sed zarî mi xwest
Wekî bêj “ev nabe caran!” Kir îşaret bi çenê

Pur xebat kir wekî dil em vegerînin neqeda
Tev jî bê feyde çiqasa em tesellî didinê

Jixwe ser yek me heye, wî jî li me jêke welê
Ramûsanek bi me de j' lêvê tenik ji gerdenê

Te bi wê şox û şepaliya xwe qelbê me dizî
Qene rûtirşî meke carek li halê me binê

Lê bişînî ji nûşînî ji çehvan wek rim û tîr
Qet bi carek nadime terka te hetta mirinê

*Wezn: Fa‘ilatim/Fa‘ilatim/Fa‘ilatim/Fa‘ilim
**Ji dîwana wî Derdê Welat, rr: 32-33, 2018, Nûbihar