Roşan Lezgîn - Dîyarbekir De Eşq

Berê Koyî ra hetanî Berê Ruha
Gaman peymawena ez
Ver û verê bedenî de...

Vayêko honik yeno, vayê koyan
boya rîhanî tede
Vakur ra yeno, nermek...
Xuşşînî kewta pelanê çinêyeran ser
Valêrî porê xo şane kenê vayî ver de
Xubêrî boyêka xumrî resnenê heme ca
çîveçîvê meqesokan a, mîlçikî bi wîlewîl
Porê bedenî; çokêk vaş

Sereyê mi xoş
Canê mi mest...
Xîyalê mi de abîyayîşê vilêka sûre
û serê engiştanê rojî ra ez
Sosinan çînena qevd bi qevd...

Tîya şerq o; Dîyarbekir yanî
şingeşingê tasanê sifrênan a
Awa sûsî roşeno Bavê Elo û keynekî tuyan
Lewê înan “qere hubur”

Duyê kebabê cîgere vila beno
Binê ziwanê mi de tehmê çayêka qaçaxe
û zincîya mi boya titûnê Helhelî ra pirr
Ez tewirêna ya ewro; sermest
Zerrîya mi yew pirpirok a ewro

Rîyê asmênê nîlgunî de hewrê gulanî
Va dest dano hewran û yena war:
Reşêşêka hurdî...
Dima ra, asmênê Dîyarbekirî de
Keskesûre bena keman
Kerrayê dêsê bedenî sereşute
Awin-awin huyenê
û kewe-kewe bereqîyenê pelê daran
Dîyarbekir o tîya; heme ca rengîn…

Keynekêk wet ra yena; esmer-esmer
çimê aye; mîyanê zeytî de çutêk zeytûnî
û lewanê aye ser o çilkê varitî
Poro sîya vayî ver de rewan...

Mîlçikî wanenê
û ma, çimanê yewbînan ra awiran remnenê
Alişkanê ma de vilî abenê
Di zerrî: di pencerayê akerdeyî;
Di boranî sipî-sipî perrenê qefesan ra
û ma çimanê yewbînan ra şerab şimenê:
-Noş!
-Noş!...
___
*Dêsan de Sûretê Ma Nimite, Weşanxaneyê Roşna, Dîyarbekir 2013, r. 43-46