A B C D E F G H I J K L M N O P Q R S T U W X Y Z
Remûzat - Esmeralda
532 Xwendin
57 Ecibandin
Asoya Helbesta Kurdî

Remûzat - Esmeralda

Min tariya şevê li ber keysa xwe dît;
stêrk serxweş,
hîv birqonek
carekê vebû devê tirsonek

Esmeralda
min ji te re dil da
Ku Remûzatekî kirêt bim jî di vê çîrokê da
Bila navê min neyê bilêvkirin ji te cuda

Dizanim, divê wisa nebûya
Ti çîrok wisa dest pê nakin
di her xewnên rengîn de
neheng tim çeleng in

Di dêst de dar
ji paş ve diçerixînim vê çîroka qedexedar

Li xwe baş binêre.
Dibe ku berî vê hevokê du sê tiştên din jî te gotine
nayê bîra min
berî vê jî demên berê yên bêyî te jî
tî me, tî û kelogirî
divê hevokên wisa bi carekê ve dernekevin ji devî

Şewqeya min a şepirze di dîwarê de hilawistî
tîpên dabeşker darîçavan
ez li filketê daliqandî


Di dêmê te de xalek
navnîşana êşan e
her ku tu dikenî întîxara min dibe

Nivîsên bizmarî bizdok in, newêrin navê te binivîsin
bi ser peyvan de diçim
çavên te du dest agir berdidin di nîveka hevokekê de
daçek biçek in
lê ti kes nizane erka kirdeyê veşartî çi ye
di nava vê ziqaqa kesayetîveşar de

guleyek ji Gulê hat
gul bişkivîn cihê ku lê ket
bêhna sêvan tê
divê sê sêvên dawîn bin
hin çîrok şa xelas nabin
dibe ku lewra nayên gotin

Esmeralda,
rista winda
di wê şeva bêhîv da
min barê hebûnê hilda
eşq çû, êş bi min re ma

*Fermana Firindeyan, Weşanxane Belkî, rr: 20-22
**Bi destûra helbestvanî hatiye belavkirin.
Helbestên din ên Helbestvanî/ê