Pîremêrd - Yadî Nazdaranî Caf

Porre ciwanekey dewrî zerdiyan
Hay bo kinaçet demî beyaniyan

Katê sifîdey seher derkewê
Pêşxaney şefeq le kêw ser kewê

Demî bêdarî ke destî Miryem
Qonaxey ‘îsa eşiwa le ser çem

Awî zîndegî dête zemzeme
Ebê be Zemzem awî ew çeme

Zellm û Tancero dest le milan bin
Serpopey gullan cêy bulbulan bin

Dengî kinaçet berz û serazad
Deng bidatewe bê tirsî seyyad

Le kenarî Zellm ew sewze giyaye
Towî kenîşkî cafî tê da ye

To be kinaçe û lence û larewe
Min be çawêkî firmêskbarewe

Beramber be yek herdû binallîn
Herdûkman wek yek bo xêll ewdall în

Giwêm le dengit bê be yadî caran
Kiwa malle gewre û polî nazdaran?

Minîş be ferdî Mewlewîyewe
Be horey gullbang pehlewîyewe

Be şînî tîpî nazdaranî caf
Dûkellî ahim pirr ka semay saf

“Wek çîhrey xeyall ruxsarekey xoy
Le perdey dilley pirr ax û pirr oy

şu’ley rûy niwand şay sosen xallan
Kem kem le goşey burcî reşmallan

Le tiwêy tarîkî şedey Bêgerda
Le tafet awî zîndegî derda”

Êsta le şiwênî ew ’îşwe û naze
Bayequş le gell to da hamrraz e

Êllî Caf rêgay kiwêstanyan nîye
Nazanim meylî felek be çî ye

Umêdim wa ye her bem zuwane
Êllat biçinewe bo ew kiwêstane

Welî Dêwane wîstî le Yezdan
Ke rêy şem) nebê biçêt bo kiwêstan

Ewsaye du’ay ew gîrabûbû
Êsta bazarrî Welî be ser çû

Cênişînî ew minim emewê
Êll bo hewargey kiwêstan serkewê

Bellam kiwa şikoy say malle gewre
Kiwa ew zemzeme û şadî ew dewre

Êsta qel û dall le ser dirrk û dall
Lew şiwênheware epirsin ehwall

Minîş be wêney ewan dax le dill
Yadî nazdaran ebeme jêr gill

Egirîm û ellêm be dîdey nimnak
Dadî nîştiman ebeme jêr xak