Nûrî Keleş - Ma

Mi zerrîya xo sehnê, ez qey ewro bîya lal
Mîyanê dêsan de menda ez bêwar û bêhal
Welatî ser o binusî yew - di heb hal û hewal
Ma rê nêbo se wa tornanê ma rê bibo mal

Ma verê cû wayîrê îmanî bîy wayîrê fen
Ma wayîrê qewetî bîy sultanan rê kefen
Şar ma ra bander bîy îlm û îrfan
Serê ma ta pêro bîy Firawun , Nuhî rê tufan

Ma medenîyet , cemat berd dîyar
Êyê ke ma ra pey ameyî ino çî ard war
Aşik kêlmîya def dirîya mend bêwar
Şar aver şî ma peynî de mendî ey hewar

Erdê ma ziwanê ma edetê ma ma ra girewt
Ser û binê erdê ma arê kerd berd ruet
Ê bîy axa ma bîy sêqurê çimvet
Dem û dewran ma dest ra vet herimna

Aşik bi paşa ewil baykê xo aliqna
Qewm, welat raşa her çî bin ra çelqna
Rûnê înan bi zêde kam kewt dest xeniqna
Dem û dewran ma dest ra vet xeripna

Loqmatikan nanê ma ra ziwan kenê derg
Ma ziwan çin bîy kerdî payê rehmê delverg
Her çîyê xo ma ra girewt ma mendî destveng
Dinya bi dor a la qey îndêk bî derg

Zerdeşt kalik û pêxamberê ma bî
Mîyanê welatanê orteyî de sey estareyan akerdibî
Sîyaqulî cêr ra ameyî zugirdî ca bî
Hezar serran de ma viraşt înan raşabî

Sîyaqulî ameyî pê zor û kalmê
Ma kerdî umetê xo û ca verdê
Kamî ke ziwanê înan zana vat qey camêrd ê
Zerrîya pak a Homayî rê lekavayî bike bi ziwanê xo û holî

Asyaya Mîyanêne ra aşikî ameyî tîya de ronişt
Barbarî bîy hukimdar pê zulmî qederê ma nuşt
Ferheng û ziwanê ma ma ra girewt welat lişt
Ma verdayî mîyanê cehaletî de çewî ney ma xo kişt

*Şewçila: Kovara Edebî Hunerî, Hûmare: 4, Dîyarbekir, Zimistan 2012, rr: 34-35