A B C D E F G H I J K L M N O P Q R S T U W X Y Z
Mîtan Şareza - Keçê
76 Xwendin
0 Ecibandin
Asoya Helbesta Kurdî

Mîtan Şareza - Keçê

"Di îbadetgeha vî bajarî de, bi qasî nifirekê sêwî me
di xwîna xwe de hişk bûme, xerab ketime, asê bûme"

Keçê îşev min birîndar nehêle
Min bikuje

Kîjan derîyên cenetê vebûne ji evîndaran re
Min tenê di cehenemê de nehêle
Kîjan payîzên bêbext
wê te têxin himbêza germayîya dilekî din
Bang-ke wan her du celatên awirên xwe

Keçê îşev min birîndar nehêle
Min bikuje

Baranên çavbixwîn peşkan dibarîne li ser laşê min î birîndar
Pûk e li ser çîyayê bawerîya min, dilerizim
Li ber tu xwedayan negere
Bibêje kîjan Xweda wê guh bidin diayên te

Keçê îşev min birîndar nehêle
Min bikuje

Jana min bûye agirekî gûr
Kîjan xwelîyên poşmanîya jana xwe ji te re bişînim
Ku rûyê negire derkevim nav alemê

Keçê îşev min birîndar nehêle
Min bikuje

Keçê min xemiland bûka çemên dilê xwe
Miçiqî di her du destê min î tî de
Kîjan qurbanîyên xwe yê bêsûc, ji bo te ser jê bikim
Kengî ez hatim îbadeta te

Ey sitargeha min
Min gunehkar neşîne

Ji bo te hatim, pîyên min î bixwîn bibîne
Di rêya te de, ronahîya çavê min tefîya
Min bêşewq, a wiha min bêhêz û bêqewet nehêle

Keçê îşev min birîndar nehêle
Min bikuje
Şîrove

Ka tu şîroveyeke giranbuha li vê helbestê nakî?

Helbestên din ên Helbestvanî/ê