A B C D E F G H I J K L M N O P Q R S T U W X Y Z
Melayê Cizîrî - Nazikek Min Seherê Dî
113 Xwendin
0 Ecibandin
Asoya Helbesta Kurdî

Melayê Cizîrî - Nazikek Min Seherê Dî

Nazikek min seherê dî bi cemala xwe ne wek
Hor û wildan û perî bûne beşer bûne melek

Wer temaşayê şehîdên xwe ke carek tu binê
»Ehsene l-lahu we-tebarek« ji du çehvên di belek

Sinbilên ter li gulan pal-i bi mestî diderin
Sosinên taze li nisrînwereqan bûne helek

Nazika min ko bi mestî di çemen hat-i xeram
Ji hesed çûne xusûfê meh û mihr-i di felek

Ê ji xeflet te bibînit ko dimînit heyihat
Te bi çehvên di belek kuştine mezlûm-i gelek

Zerreyek `işqê giha kê we ji `eqlê xwe nebir
»Kullu men şadefehu dahiyetu l`işqi helek«

Xwisroyê `işqê ko rûniştî li ser textê wucûd
»Fetehe l-qelbe `ele l-fewri we-li r-rûhi melek«

We çi `işq û çi selamet herdu dûr in ji yekê
»Kullu men yesluku hubben subule n-nari selek«

Ah-i bêgavê ji dil tên me ji pêta di ceger
Bes tu bêfeyde neşîhet ke me dil bûye pelek

Ma ji `umrê me çi mabit were êdî vi me ra
Da di eqtarê wucûdê bikirîn seyr-i melek

Di ’stiwa’ê ko ji husna te veda lami`ekê
»nezeru ş-şemsi mine ş-şerqi ile l-xerbi delek«

Afitabê ko ne teşwîr-i ji husna te bitin
»Nûruha fî nezerî zulmetu dacin we-helek«

Ji hewa bend te kirim şubhetê bayê di sivik
çi ji biska te bibêm ah-i ji biska te çelek

Ez ji zulfa te veristim mi teleb kir lebile`l
Lê di çaha zeqenê bê ser û pa çûme helek

Bi umîda te homayî ne Melê tor-i veda
Wer temaşayê cehan bûye hemî tor û şebek
Şîrove

Ka tu şîroveyeke giranbuha li vê helbestê nakî?

Helbestên din ên Helbestvanî/ê