Melayê Cizîrî - Me Ji Bil Husn û Cemalê Çi Xered

Me ji bil husn û cemalê çi xered
Bê cemalê ji peyalê çi xered

Ger ne teşbîhê du birhên te bitin
Me di `îdan bi hilalê çi xered

Ger ne qesta dil û canê me dikit
Me ji wê şox û şepalê çi xered

Ger ne rûhê me di pê dil biretin
Me ji wê qenc û delalê çi xered

Ger ne bi-’smê te mu`emma bin hurûf
Me bi şiklê xet û xalê çi xered

Neko şermende ji rûyê te biwa
Afitabê bi zewalê çi xered

Qestê wehdet dikirit rûh-i bi rûh
Wer ne `aşiq ji wisalê çi xered

Di şebê qedrê tecella tu bikî
Me li pê mûm û şemalê çi xered

Ne cemala te tecellî bikirit
Me ji xoban bi cemalê çi xered

Ne ji le`lên te Mela behsê bikit
Me ji vê behs û su`alê çi xered