A B C D E F G H I J K L M N O P Q R S T U W X Y Z
Dîlawerê Zengî - Cizîrê
277 Xwendin
0 Ecibandin
Asoya Helbesta Kurdî

Dîlawerê Zengî - Cizîrê

Cizîrê wa xweş Cizîrê
Tucar naçî tu ji bîrê
çav li rê û bendewarî
Dîla bi bend û zincîrê

Ser sînga te Waşokanî
Ew wargeha me Kurdanî
Koşk û keleh hatin xwarî
Jê re dibên Serê-Kanî

Cizîra min gewr û rind e
Tev de bajar û bi gund e
Deşt û gelî, av û darî
Xabûr bi xuşxuş û hind e

Xakî şehdar, pitrol û kan
Zêrê sipî, reş bi kê man?
Zêrê zer koşa cotkarî
Bi destê kê we tev berdan?

Zanin ko em xwedanê cî
Xwedanê vî deşt û gelî
Xwedanê vî xak û warî
Me ava kir bi kama pî

Em Kurd in welatperwer in
Ne nandoz û ne noker in
Ne hevalên yên kedxwarî
Cegersoz û cengawer in

Ev zinara ko li Cizîr
Li gerden me bûye zincîr
Bi setem û bi koşxwarî
Dixwazin me bikin jibîr

Tucar gundê xwe bernadin
Em zanin ko win bê dad in
Karê we kolê zorkarî
ji zadê xwe kulmek nadin

Cotkarê mêr, jîr û mêrxas
Dest hilgirin tevir û das
Kulî zadê me tev xwarî
Em xizan tev mane pêxwas

Li Cizîrê û li Efrîn
Li Kerkûk û li Nisêbîn
Kobanê û Endîwarî
Li Mehabad û Hindirîn

Ji bo welat em dibêjin
Ne wek we em dilqirêjin
Nîjadperestî, zordarî
Vê ji serê xwe bavêjin

Warê bav û kalê min e
Tiştekî we qet tê tine
Wekhevî û bi dostyarî
Ev daxwaza me ye bine

Daxwaza me biratî ye
Mafhebûn û wekhevî ye
Lê rêdara we bê çarî
Guhnadêr in sûde çiye?

Win carekê temaşa kin
Vî zinarî j` nav me rakin
Bese dijmin, setemkarî
Pêşketiyê vêga bakin

Bi rengê we`y kevneperest
Sipartin nakin ne radest
Me berxwedan û pêdarî
Bi das û tevir û bi dest

çerxa gerdûn, wa pêşketî
Miletê Kurd, ne raketî
çi daxwaza vî zinarî?
Bese weha bê rûmetî..