A B C D E F G H I J K L M N O P Q R S T U W X Y Z
Cegerxwîn - Sala 1959ê (Kengî Bixêr Bêtin Buhar)
409 Xwendin
0 Ecibandin
Asoya Helbesta Kurdî

Cegerxwîn - Sala 1959ê (Kengî Bixêr Bêtin Buhar)

îsal zivistana me sar
berfa sipî hûr tête xwar
xemlandine deşt û zinar
kengî bixêr bêtin buhar

hezar û pîncî û nehê
em 24ê sîmehê
berfa me hûr hûr tê behê
kengî bi xêr bêtin buhar

nahêle berf em derkevin
em girtiyê roj û şevinê
xew nayê em ranakevin
kengî bi xêr bêtin buhar

buhar xweş e, çaxê gulan
çaxê kulîlk û simbila
newroz û sersala dila
kengê bi xêr bêtin buhar

bilind dibî ala me jî
balê bidê, xweş dihejê
milet hemî serbest bijî
kengî bi xêr bêtin buhar

sond xwariye ranakeve
xencer ji dest danakeve
dîsan bi ser çiyan keve
kengî bixêr bêtin buhar

baran li berfa şenivî
bê û pey roj derkevî
tev şîn dibin dar û derî
kengî bixêr bêtin buhar

zanim buhar azadî ye
serbestî û dilşadî ye
doza me cejna Madî ye
kengî bi xêr bêtin buhar

roja me Kurda azad dibe
ala me serbest liba bibie
dilê Cegerxwîn şa dibe
kengî bixêr bête buhar
Helbestên din ên Helbestvanî/ê