A B C D E F G H I J K L M N O P Q R S T U W X Y Z
Cegerxwîn - Fidakarê Welat Im
130 Xwendin
0 Ecibandin
Asoya Helbesta Kurdî

Cegerxwîn - Fidakarê Welat Im

Erê dayê metirse vame ha tim!
Wekî roj im niha vame hilatim!

Ji bo ko te ji dest dijmin derênim
Wekî Zab û Ferat im, kêferat im

Dixwazim derkevim şax û zinaran
Li ber dijmin wekî lat û kelat im

Ji min dijmin ditirsî, pir dipirsî
Ku ez hatim wekî Zab û Ferat im

Didim ber xwe hemî sermayedaran
Wekî şap im di Sîpanê Xelat im

Ji dostan re hemî pertav û ronak
Ji dijmin re wekî ar im, şewat im

Ji bo jar û belengazan bihar im
Ji bo har û neyaran ez şibat im

Li tarîxê binêrin ez kuda me?
Xwedi eywan û birc û pût û lat im

Ev im ez, lê di bin destê neyaran
Eger rokê ji xew rabim du qat im

Li ber pozê neyaran xurtemêr im
Ciger-xwînim, fidakarê welat im.
Şîrove

Ka tu şîroveyeke giranbuha li vê helbestê nakî?

Helbestên din ên Helbestvanî/ê