Cegerxwîn - Bête Hêç Im Welat

Welat, çi qas bilind bibî
Ew qas e jî bilind dibim
Her çend pak û rind dibî
Ew çend pak û rind dibim

Serbest bijîn bajar û gund
Kurd tê de rûnin serbilind
Wek feylesûfê çîn û Hind
Bi rûmet û mezin dibim

Kengî tu payadar bijî
Ala li her der rahejî
Belav bibî pesnê te jî
Navdar û pir pesend dibim

Bilind bibi pir xwendegeh
Cotar û karker bibne şah
îdî di dil namênî ah
Ronî didim wek find dibim

Dîsa çîya tev şîn bibin
Xort û keçik tev dîn bibin
Hin wek Mem û hin Zîn bibin
çîrok di nava gund dibim

Heta ko gundî rakevin
Wê b` dehkera min dakevin
Zû xew bi çavan nakevin
Taxûrê Hind û Sind dibim

îro tu bin destê neyar
Bê leşker û ferman û dar
Qul, qul dirazim rengê mar
Hawar bi rengê kund dibim

şêr im kurê Mîtanîya
Cihê minin şax û çîya
Doza me axa Mîdîya
Nêzîk e wek axunde dibim

Divê ko em şîyar bibin
Bo şoreşê li kar bibin
Haval ûdost û yar bibin
Wê çaxê wek ferzend dibim

Hilmek ji wan baxên di şîn
Pir xweş dikî derd û birîn
îdî ciger nabî bi xwîn
Govend li dor Elwend dibim.